प्रदेशका कानून सबैले जानुन भन्ने नारा हाँस्यास्पद : विवेकशिल साझा पाटी बागमती प्रदेशका संसदीय दलका नेता रमेश पौड्याल

विवेकशिल साझा पाटी बागमती प्रदेशका संसदीय दलका नेता रमेश पौड्यालले सरकारले ल्याएको नीति तथा कार्यक्रममा ल्याएको ‘प्रदेशका कानून सबैले जानुन भन्ने नारा हाँस्यास्पद रहेको बताउनुभएको छ । नेता पौडेलले आज नीति तथा कार्यक्रमबारे छलफल गर्न बसेको प्रदेशसभा बैठकमा अब प्रदेश सरकारले नागरिकलाई कानून पढाउन थालेजस्तो देखिएको भन्दै उक्त नारा हाँस्यास्पद रहेको बताउनुभयो् । प्रदेश सरकारले बनाएको कानुन कार्यान्वयनमा आउन नसकेका भन्दै ऐनामा धुलो लागेको छ भने अनुहार पुसेर हुँदैन ऐना नै पुस्नु जरुरी छ भन्दै मुख्यममन्त्री डोरमणि पौडेललाई अनुरोध गर्नुभएको छ । उहाँले विगतको आर्थिक वर्षहरुको नीति तथा कार्यक्रमको समिक्षा नगरी नीति तथा कार्यक्रम ल्याइएको कारण प्रभावकारी नभएको बताउनुभयो । नीति तथा कार्यक्रम बनाउँदा तथ्यमा आधारित भएर कार्यक्रम तयार पार्न नसकेको र गल्ती सच्याउने, सुधारका काम गर्न नसक्दा प्रदेश सरकारले प्रभावकारी योजनाहरु ल्याउन नसकेको उहाँले बताउनुभयो । प्रदेश सरकारले खोपको आवश्यकतालाई जिम्मेवारी पूर्ण रुपमा नलिएको बताउनुभयो । विगत एक वर्षदेखि प्रदेशका नागरिक खोपको आसमा बसेको तर प्रदेश सरकार भने यती वेला नीति तथा कार्यक्रममा खोपको कुरा उठाइरहेकाले प्रदेश सरकार जनता प्रति उत्तरदायी नरहेको उहाँको भनाई रहेको छ ।